CHABELITA


A JAZZY ARTCLIP
By Gedion Chandler ft. Francis Sling
(binnenkort in het nederlands)
Nos tur ku a wòrdu lanta na Kòrsou ta familiarisá ku e kansion
di Chabelita. Un kansion original di sr. Elis Juliana (Ompi Elis), kontando di e travesura di
Chabelita i esaki su konsekuensianan. En realidat, nos tur tin un tiki Chabelita den nos; e
deseo ei pa bai (purba) hasi kosnan ku nos sa ku no ta korekto i na final nos tambe, meskos ku
Chabelita, tin ku siña di e konsekuensianan di e eskoho ku nos a hasi.

Gedion Chandler i Francis Sling ta artistanan lokal ku ta karga un amor grandi pa e pais aki, pa
su kultura i su hendenan. Ámbos artista ta konvensí ku ta importante pa pasa kansionnan lokal,
manera Chabelita, na nos generashonnan benidero. Prinsipalmente mirando e moraleha asina
bunita ku e kansion aki ta karga.
Esaki a trese kuné ku e Gedion i Francis a uni nan abilidatnan artístiko i a trese e kansion di
Chabelita bek di forma oudiovisual, kombinando músika Jazz i arte.

Gedion Chandler a kombertí e melodia konosí di Chabelita, ku hopi di nos a tende òf a kanta
den nos infansia, den un bunita kansion di genero Jazz. Pero sinembargo el a mantené e esensia
original di e kansion produsi pa sr. Ellis Juliana. Francis Sling (www.iamapieceofart.com), a
inkorporá entre otro téknikanan impreshonante di pintura, video i efektonan visual pa asina duna
bida na e kansion aki.
Na luna di Yüli di e aña aki e grabashonnan a tuma lugá aki na Kòrsou, na momentu ku e
murayanan di un kasita no habitá den kura di Francis su mayornan a wòrdu kombertí den e
esenario pa e historia di Chabelita.
Ámbos artista a invertí hopi tempu i dedikashon den e produkshon aki, prinsipalmente mirando e
echo ku tantu Gedion komo Francis ta artistanan ku kurason pa e arte lokal den su totalidat.

For di den transkurso di e siman tras di lomba un i tur por a atmirá e ‘Jazzy artclip’ di Chabelita
riba e página di Youtube i mas ku klaro tambe kompartié ku famia i ser nan kerí; prinsipalmente
ku nos muchanan.
Tambe por mira e potrètnan di e momentunan ku a krea e esenario i momentunan di grabashon
di e videoclip aki riba www.iamapieceofart.com. Mas ku klaro riba e página di Facebook di tantu
Gedion Chandler komo Francis Sling tambe tin algun di e potrètnan aki i “links” ku un i tur por
disfrutá di dje.

Ta algu sumamente emoshonante pa por mira kon un kansion ku a forma parti di e edukashon
di hopi di nos por a haña bida di un forma asina bunita. Imágennan di e produkshon aki di
Chabelita siguramente ta pone hopi di nos rebibá momentunan dushi den nos infansia i ta trese
bek rekuerdonan.
E esfuerso i trabounan duru di Gedion i Francis no tabata enbano. Chabelita ta, sin duda algun,
un produkshon lokal di kalidat haltu i na un nivel profeshonal ku nos por ta sumamente orguyoso
di dje.

468 ad